Loading...

Thursday, July 5, 2012

حەمدی

ئەم ئەهلی كەمالە هەموو حەیران ومەبهووت
ئەم ئەرزە لەدووت بۆچی نەلەرزایەوەنەبزووت
ئەی توركی پەری چەهرە بەو سەوگەندەوە دەیڵێم
بۆتۆیە دڵی خەڵكی وەكو غونچە نەپشكووت
بۆمردنە ئەیدا بەیەكا ئێستە حەلەب لەب 
ڕووناكی لە ددڵیا نییە بەیروت بەبێ‌ ڕووت
ئەوشامە كەشامی بەمەسەل سوبحی جەژن بوو
بێ‌ تۆ سەحەری شامی غەریبانە بەبێ‌ قووت
ئەم دینە مەدینەی نییە مەككە مەكە دەخڵی
بێ‌ یومنی یەمەن تائیفە ئەڵبەت بووە پەڕپووت
بێ‌ نووری بەسەر بەسڕەیە بێ‌ شوبهە زەلیلە
بێ‌ كەڵكە بڵێم بیكەمە قوربانی كوێت كووت
وێرانە عەمارە لەزەمیندایە سەماوە
دێوانەیە دیوانییە بۆ سیلسیلەی مووت
خۆی ناوەتە قوڕقوڕنەڕەوانە دووچاوی
دووشەت بگەڕێ‌ ڕوویی جیهان بۆ خەتی ئەبرووت
ئەم شاری سولەیمانییە وەك تەختی سولەیمان
وا كەوتە هەوا ئاگری گرت بوو بەقەرەبرووت
[حەمدی] كەبەقەد زەڕڕە حەیاتێكی كەما بێ‌
هەربۆئەوەیە بێتە فیدای نێرگسی جادووت

حەمدی ئەڵێت

هیچ كەسێ‌ ناوی شكەنجەی پەرچەمی دولبەر نەبات 
با حەیای مەجمەرنەچێت وئابڕووی عەنبەر نەبات
خەنجەری ئەبرۆت ئەبوایە نەدرایەتە دەست چاوی مەست
كەوتە خوێن ڕشتن وخوا ڕەحمێ‌ بكات وسەرنەبات
لەم خەراباتە چ مەردێ‌ غەیری ڕەندی بادە كەش 
بۆ لەمەیدانا كەسەری دەرببا سەردەرنەبات
دامەنی هەڵكردووە بەو بەردەوە ڕازی نییە
ئەم ڕەقیبە زۆر نەفامە هەڵمەتی پشدەر نەبات 
بگرە زوو خوێنی ڕەگی سەودایی عاشق ئەی موژە
بابەشێتی سەری ئولفەت بەردەمی نەشتەر نەبات
بەرگی تاقەی شینی سورمەی كردە بەرڕەنگە فەلەك
ڕووبپۆشێ‌ حورمەتی خۆیی ومەهـ و ئەختەرنەبات
حوكمداری كیشوەری سەبرە گەدایی كۆیی یار
پێی بڵێن حەسرەت بەجاهی شاهی حەفت كیشوەر نەبات
عاشقی هیممەت بڵندە وەختی كوشتن ئەوكەسە
دامەنی جەللادێ‌ نەگرێ‌ و دەستی بەر خەنجەر نەبات